Fidel Castro a thi Cuba ram pumah December 4 thleng sun dawn

Cuba ram roreltu hlui, Fidel Castro chu kum 90 mi niin kar kalta Zirtawpni zan khan a thi a, ram pumah ni kaw chhung an sun dawn.

Hnam puanzar chu ni kaw chhung a ngul chanve-in zar a ni dawn a, vawiin aṭangin ram mipuiten Castro-a ruang hi zahna an hlan thei ang. President hlui sun a nih chhung hian zu hralh chhuah khap a ni a, concert leh intihhlimna lam chi neih pawh khap a ni bawk. Castro-a vap hi an ram chhung hmun hrang hrang fanpui a nih hnuin, December 4-ah state chawimawina famkim nen vuiliam a ni ang.

Fidel Castro hian Cuba-ah kum 1959 khan ro rel ṭanin, kum 49 chhung ro a rel a, communist ram a din a ni. US-in paihthlak tumin hun rei tak bei mah se a hlawhtling thei lo. Castro thlawptute chuan US-in Cuba ram a dahhniamna dodal a, Cuba chu a ram mipuite hnena pe kirtuah ngaiin an ngaisang a, a sawiseltu lam erawh chuan dictator tiin an sawi thung.

Castro hi kum 2006 khan a ril lam fel loh avangin na takin a dam lo a, hemi hnu aṭang hian a ṭha chhuak thei tawh lo a, mipui hmuhah pawh a inlan khat tawh hle.

Ram hruaitu hrang hrangte chuan Cuba hruaitu hlui hi an ui thu an sawi a, hetihlai hian US President-elect Donald Trump chuan Castro chu dictator rawng tak tiin a sawi thung. Russia President Vladimir Putin chuan Castro chu Rusia ram ṭhianṭha leh rintlak a ni tih a sawi a, China President Xi Jinping chuan an thawhpui mi ṭha tak an chan ta tih a sawi.

Fidel Castro

1926 : Cuba chhim chhak lam, Oriente Province-ah a piang.

1953 : Batista rorelna laka a hel avangin man a ni.

1953 : Intiamkamna nen jail aṭangin chhuah tir a ni.

1956 : Che Guevera nen sorkar lakah indo an puang

1959 : Batista hnehin Cuba prime minister atan lakluh a ni.

1961 : Bay of Pigs lak tuma beitute a bei let.

1962 : An ram chhungah USSR-in nuclear missile a dah a phalsak

1976 : Cuba National Assembly-in president atan a thlang

1992 : Cuba refugee-te chungchangah US nen inremna an siam

2006 : A hriselna ṭhat tawk loh vangin a nau Raul Castro hnenah thuneihna a pe a, kum hnih hnuah president aṭangin a bang.