Khawvel

Singapore-ah Suu Kyi-i a zin dawn

Myanmar State Counselor Aung San Suu Kyi-i chu tunkar chhung hian Singapore-ah a zin dawn.

Singapore Prime Minister Lee Hsien Loong chuan Suu Kyi-i hi zin turin a sawm niin official thuchhuah chuan a tarlang. Lee hian kumin April 1-a Myanmar sorkar thar lakluh a nih hnuah Myanmar hi a lo tlawh tawh a, a cham chhung hian ram pahnihte hian passport holder-te tan ni 30 chhung visa telloa intlawh tawn theihna tur inremna an ziak a, he inremna hi December 1 aṭang hian hman ṭan a ni ang. Singapore hi China dawta Myanmar rama investment ti lian ber a ni a, kumin October thla thleng khan UD dollar tluklehdingawn 15.596 hu investment a titawh a ni.

Israel PM-in Palestinian president lawmthu hrilh

Israel Prime Minister Benjamin Netanyahu chuan ram kang ṭhelh kawnga pui tur a, kangṭhelhtu team leh motor a tirh avangin Palestinian president Mahmoud Abbas chu lawmthu a hrilh.

Israel leh a ṭhenawm, West Bank, Egypt leh Lebanon-te chu ni nga chhung zet ramkangin a tibuai a ni. Palestinian National Authority chuan Haifa-a ram kang ṭhelhnaa Israel pui tur hian kangṭhelh motor pariat a tir a, Inrinni khan West Bank-a Juda-te chenna bial, Halamish-a ram kang ṭhelh turin truck pahnih a tir leh bawk. Haifa-a ram kang hian ram acre 9,880 zet a tuam a, khawpui chhunga cheng tam tak chu sawnchhuah an ni bawk.

Trump-a’n vote chhiar that phutna a pawm lo

US President-elect Donald Trump chuan Green Party presidential candidate Jill Stein-iín President thlan naa vote tla chhiar ṭhat a phut chu thil tih awm lo tak a ni tiin, a pawm loh thu a sawi.

Trump chuan inthlan result chu sawi buai loa pawm tlang turin a ti a, Jill Stein-i chuan vote tla aṭangin 1% pawh a hmuh phak loh laia vote chhiar ṭhat a phut chu thil awm lo tak a ni, a ti. Stein-i hian Zirtawpni khan Wisconsin state-a vote chhiar ṭhat phutna a thehlut a, tunkar hian Michigan leh Pennsylvania-ah thehluh leh a tum. Clinton-i campaign chuan Jill-i hmalakna hi an thlawp dawn tih a sawi.