Cameroon inthlanah kum 92 mi President Biya a tling leh

Cameroon president thar thlanna neihah president nilai, kum 92 mi Paul Biya chu a term sarihna turin thlan tlin a ni leh. Khawvela ram khat president ni thei upa ber a ni.

Inthlan hi October 12 khan neih a ni a, Constitutional Council chuan Thawhṭanni khan inthlan result puangin, Paul Biya hian vote tla aṭanga 53.66% a hmu a, president atan thlan nawn a ni tih a puang. A khingpui, eptu pawl candidate Tchiroma Bakary chuan 35.19% a hmu ve bawk.

Result puan hma hian eptute chuan inthlan result dik leh langtlang an phut tih sawiin nawrh an huaihawt a, nawrh huaihawtnaa buaina chhuakah mi pali an thi. President Biya-a khingpui, Bakary chuan an party-in an chhut dan aṭangin inthlanah hian a chak niin a lo sawi lawk a, buaina chhuaka thite chu security force-te kah hlum niin a tarlang.

Kum 92 mi, Biya hian kum 1982-a Cameroon president hmasa ber a ban hnuin thuneihna hi a chang a, kum 2008 khan president term chelh thei zat siam chu titawpin president atan hlan thlan chhunzawm a ni ta zel a ni. President term hi kum sarih a nih avangin a term a hman zawh chuan kum 100 a hnaih tawh dawn hle a ni.