Myanmar-in ram dang mi sing chuang hreng

Myamnar sorkar chuan thla kua liam ta chhungin online scam-a inhnamhnawih, dan loa an rama lut ram dang mi 10,000 a hreng tawh.

Ministry of Information-in nimina a tarlan danin, October 27 thleng khan China leh Thailand nena online scam kaihhnawiha beihpui an thlaknaah mi 10,119 man ni tawhin, an zinga mi 9,340 chu anmahni ram lamah thawn kir an ni tawh. Mi dang an la hrente pawh thawn kirna tur buaipui mek a ni bawk.

Sipai sorkara thupuangtu, major general Zaw Min Tun chuan ramria scam network lian tak kalpui a nih chungchangah sipai sorkar dodaltu, hnam bil pawl Karen National Union chu a puh. KNU chu Thailand leh Myanmar inrinaa scam centre lian, KK Park siam phalsakah a puh a, ram hmantirna man leh security an pek vangin KNU hruaitute hian sum lamah hlawkna an tel a ni, a ti.

Hetih lai hian KNU foreign affairs hotu, Saw Taw Nee chuan sipai sorkar puhna chu phain, sipai lam zawk hian kum tam tak an hlawkna turin an lo ti tawh a, ram dangten an ngaihven a, an nawr hnuah mi dang puh tur an zawng chawp mai niin a sawi ve thung.