Coronavirus vangin mi 56 an thi tawh
China-a Wuhan khua aṭanga nikum December thlaa hmuhchhuah ṭan, coronavirus chuan China ram leh ram ṭhenkhatte a run mek a, he natna hri leng vang hian China ramah mi 56 an thi tawh a ni.
China ram pumah mi 1,975-in he hri leng an kai tawh thu Inrinni khan tarlan a ni. Nimin khan he hri veitu zinga mi 15 an thih belh leh bawk. Hubei Province-ah mi 13 an thi tih leh, Henan Province-ah leh Shanghai-ah pakhat ve ve an thi tih tarlan a ni. He hrileng hi a ṭaidarh zel loh nan China chuan nimin aṭang khan ram chhungah ramsa lakluh a khap bawk.
Coronavirus vanga Shanghai-a thi hi kum 88 mi a ni a, China ram bial khat zingah chuan Shanghai provice-ah hian mipui an cheng tam ber a, sumdawnna hmun lian tak a ni bawk. Hei vang hian he khua hi ven uluk a ngaih thu Shanghai’s municipal health commission chuan a sawi.
He natna rawn ṭaidarhna khua, Wuhan-ah hian medical expert mi 1,230 an tirhluh tawh thu China’s National Health Commission chuan a tarlang. Wuhan-ah hian China sipai lam pawhin military medical university pathum aṭangin mi 450 an tirhluh tawh thu an tarlang ve bawk.
Hong Kong-ah pawh coronavirus hi mi pahnihin an kai tawh a, Canada-ah pawh China-a Guangzhou khua aṭanga Tornoto-a haw mi pakhatin a kai tih hriatchhuah a ni ve bawk. Thailand, Japan, South Korea, US, Vietnam, Singapore, Malaysia, Nepal, France leh Australia-ah te he natna hi a ṭaidarh tawh a ni.
Inrinni khan Communist Party of China (CPC) Central Committee chuan anrama hri leng mek ven leh khuahkhirh a nih theih dan tur ngaihtuahin meeting an nei. He meeting hi CPC Central Committee general secretary Xi Jinping chuan a kaihruai a ni. Meeting-ah hian hri leng mek venna leh khuahkhirh hna thawh dante enpuitu tur group din an rel a, hei bakah he hri vei mekte enkawl dante zirchiang a, ruahmanna tharte siam an rel bawk a ni.
China President Xi Jinping chuan party leh sorkar official-te chuan an hna thawhna hmuna awm nghet tura chahin, mipuite chiai tur veng tur te, Chinese New Year festival pawh boruak muanawm leh hlim taka an hman theihna tura theihtawp chhuah turin a chah.