Vietnam-ah tuilian vanga thi mi 13 tling tawh

Vietnam rama tuilian vanga thi chu nimin thleng khan mi 13 an tling tawh a, chin hriat lohin mi 11 an la awm bawk.

Central Vietnam-ah October 25 aṭang khan ruah nasa takin a sur chhunzawm reng a, hei vang hian hmun tam takah tuilian leh leimin a thleng a ni. Hue City leh ancient town, Hoi An te chu tuilian tuar nasa zingah an tel a, chenna in tam tak chu tuiin a chim tawh a, ruah hi vawiin lamah pawh a la sur chhunzawm dawn nia sawi a ni.

Sorkar hnuaia disaster agency chuan tuilian hian chenna in 116,000 chuang a chim bakah, thlai chinna ram hectare 5,000 a zau a chim vek bawk niin a tarlang. Kawngpui leh rel kawngte chu tuiin a chim avangin inkalpawhna lamah harsatna a thlen a, hmun tam takah power supply an nei lo bawk.