Philippines-ah thlipui tleh vangin Mi nuai hnih chuang sawn chhuak
Philippines ramah thlipui na tak, typhoon Kammuri tleh vangin tuipui kam leh tlangsang hmuna cheng, mi nuai hnih chuang chu tuilian leh leimin a thlen venthawn thilah hmun him lamah sawnchhuah a ni.
Typhoon Kammuri, Tisoy tia an sawi bawk hian an ram huna Thawhṭanni zan khan Philippines hi a nuai a, kumina Philippines nuaitu typhoonm 20-na a ni. Thlipui hian darkar khata km 155-a naa tlehin Philippines hi a nuai a, chenna in eng emaw zat len chhiain thingkung tam tak a len tlu bawk. Thlipui nat lam hi Category 4 Atlantic Hurricane nen a intluk a ni.
Philippines disaster agency chuan province hrang hrang aṭangin venthawn thilah mi nuai hnih chuang hi sawnchhuah an ni tih a sawi. Nimin khan an ram khawpui, Manila bulah thlipui hi a tleh a, hei vang hian Ninoy Aquino International Airport pawh nimin chawhma dar 11 aṭang zan dar 11 thleng khar zui a ni. Airport khar vang hian flight 499 zet chu an thlawh hun sawn a ni a, hei hian khualzin 100,000 zet a nghawng buai.
Southeast Asian Games buatsaihtute chuan thlipui tleh vang hian intihsiakna neih tur ṭhenkhat chu an titawp lailawk bawk a, heng zingah hian windsurfing pawh a tel. A ṭul dan azirin intihsiakna dang pawh tihtawp lailawk a ni dawn tih an sawi.
Metropolitan Manila-ah chuan thlipui tleh vangin nimin khan sorkar office leh school-te khar an ni a, coastguard-te pawhin tuipui lamah zinchhuah an khap bawk. Thli tleh hian Luzon lam panin, vawiin hian chhim lam panin South China Sea a thleng dawn nia sawi a ni.