Dubai hospital-ah Pervez Musharraf dah

Pakistan President hlui, General (retd) Pervez Musharraf chu Thawhṭanni khan Dubai damdawi-inah dah a ni. 

Pervez Musharraf hi a lung lam a ṭhat loh bakah a blood pressure a ṭha lo hle a, hei vang hian damdawi-inah dah luh a ni tih Pakistan Today chuan a tarlang. President aṭanga paihthlak a nih hnuah, Musharraf hi kum 2016 khan inenkawlna a mamawh chhuanlamin Dubai-ah hian a tlanchhia a, Pakistan lamah a la  kir leh lo. 

Pakistan-ah hian president a nih laia ram phatsana puhna chungchangah thubuai a nei mek a ni. A thubuai chungchanga special court-in November 28-a thutlukna siam a tum chu Isla­mabad High Court (IHC) chuan hun a pawhsei tir leh ni. 

All Pakistan Muslim League thupuangtu chuan Musharraf hi thawk lamah harsatna a neih bakah anxiety a nei bawk niin a sawi. Doctor-ten a chenna hmuna an endik hnuah, damdawiin lama inenkawl turin an ti niin a sawi. Dubai American Hospital-ah dah niin, test hrang hrang neihpui a nih thu a sawi.