US leh China-in military communication channel siam remti

US defence secretary Pete Hegseth chuan US leh China inkar chu a ṭha chho hle tih sawiin, ram pahnihte hian an sipaite tan direct communication channel siam an remtih thu a sawi.

Inrinni liam ta zan khan Hegseth leh China defence minister, Admiral Dong Jun te chu regional scurity meeting, ASEAN Defence Ministers Meeting-PLUS meeting neih kar lakah Kuala Lumpur, Malaysia-ah an inhmu a ni. Ram pahnihte inkara inremna leh inpawhna ṭha siam an remti tih an tarlang.

Hegseth chuan meeting-a an thusawite pawh president Donald Trump pawh a hrilh ve nghal thu sawiin, US leh China inkar chu tun angin a la ṭha ngai lo tih an ngaihdan a ni ve ve tih a sawi. Trump hian kar liam ta khan South Korea-ah China president Xi Jinping a lo hmu ve tawh bawk.

US-China military communication channel siam dan tur kimchang ngaihtuahin Dong nen meeting an la neih leh tur thu Hegseth chuan a sawi bawk a ni.