Vietnam-ah tuilian vangin mi 35 an thi

Vietnam ramah kar liam taa ruah sur nasa leh tuilian avanga thi chu mi 35 an tling tawh tih disaster management official-ten nimin, Pathianni khan an tarlang. Chin hriat lohin mi panga an la awm bawk.

Kar liam ta khan Vietnam-a tuipui kam bialah ruah a sur nasa hle a, Pathianni hmasaa darkar 24 chhunga ruah sur zat chu meter 1.7 a tling pha a ni. Ruah sur leh tuilianin chhiatna a thlena thi hi Hue, Da Nang, Lam Dong leh Quang Tri province-a mite an ni tih Vietnam Disaster and Dyke Management Authority (VDDMA) chuan a tarlang.

VVDMA chuan nimin thleng khan tuilianin chenna in 16,500 chuang a la chim tih a sawi a, ranvulh 40,000 pawh tuilianin a len a, thlai chinna ram hectare 5,300 pawh tuiin a chim vek bawk. Ruah sur nasa avanga tuilian an tawrh bakah, hmun tam takah lei a min bawk a ni. Environment Ministry chuan kar liam ta chhung khan leimin liantham hi hmun 150 chuangah a thleng niin a sawi.