Indonesia President chenna in bulah grenade tipuak
Indonesia khawpui, Jakarta-a Presidential palace bulah nimin zing khan grenade a puak a, sipai pahnihin hliam an tuar.
President thupuangtu chuan he thil thlen lai hian President hi inah a awm lo tih a sawi. Grenade puah hun hi an ram huna zinglam dar 7:15 a ni tih Jakarta police hotu Gatot Eddy Pramono chuan a sawi. He hmuna exercise laa kal sipai pahnihin hliam an tuar a, damdawi-inah hruai nghal niin an ngaihtuah awm lo.
Pramono chuan grenade tipuaktu leh eng vanga tipuak nge tih hriat chian theih a la ni lo tih sawiin, an chhui mek thu a sawi. November thla khan Indonesia-a Medan khawpui police headquarters kawtah kum 24 mi, university zirlai pakhat chuan thihchilh bomb a lo tipuak tawh bawk a, mi parukin hliam an tawrh phah a ni. He thil thleng hi Indonesia ram hmun hrang hrangah pawikhawhna thlentu, Islamic State (IS) firfiak pawl zawmpui, Jamaah Ansharut Daulah (JAD) te tih nia sawi a ni.
October thla khan Islamist firfiak nia sawi pakhat chuan university building-a function neihna hmunah security minister hlui Wiranto chu a lo vit tawh bawk.