UN climate change conference Madrid-ah ṭan

United Nations Climate Change Conference COP25 chu Thawh­ṭanni khan Spain khawpui Madrid-ah ṭan a ni a, kalkhawmte hian 2015 Paris Agreement kalpui dan tur chungchang an ngaihtuah ang.

Opening ceremony-ah hian Intergovernmental Panel on Climate Change (IPCC) chairman Hoesung Lee chuan inlawmna thuchah sawiin, khawvel hi a kal ngaia a kal reng a nih chuan boruak lum zel theihna turin risk kan la a, chu chuan mihringteah nghawng ṭha lo tak a nei thei dawn a, damkhawchhuah zelna kawngah harsatna a thlen dawn a ni, a ti. 

UN Secretary General Anto­nio Guterres pawhin sik leh sa inthlak danglam zel dona kawngah thawhhona ṭha leh insiamrem thuai theih a ṭul thu a sawi bawk. COP25 hi a thleng tur tak chu Chile a ni a, mahse tualchhung buaina an tawh avangin Spain hian an thleng leh ta zawk a ni.

Acting Spain prime minister Pedro Sanchez chuan climate emergency dona kawnga khawvel khawpuiah Madrid chu hman a ni dawn tih a sawi. COP25-ah hian Paris Agree­ment Article 6 chu ngaihtuah tur pui ber a ni a, hemi hnuaiah hian carbon, emission trading scheme leh market mechanism chungchanga thawhhona chawilarna tur a tel a ni.

Zirtawpni thleng hian confe­rence hi an nei dawn a, Argentina, Costa Rica, Ecuador, Guatemala, Honduras leh Dominican Republic President-te an tel a, Morocco leh Saadeddine Prime Minister-te an tel bakah Othmani Prince Albert of Monaco pawh a tel bawk.