Nigeria-in US President thusawi chhang let

US president Donald Trump-a'n Nigeria rama Kristiante tihduhdahna leh thahna thlengah a ṭul ang sipaite hma la tura ruahmanna siam tura Pentagon a hriattir chungchang chu Nigeria chuan chhangin, sipai chakna hmangin an ramah beihpui an thlak thei ngawt lo tih a sawi.

Nigeria president Bola Tinubu thupuangtu, Daniel Bwala chuan Trump chuan report dik lo hmangin an ram chu a vau tih sawiin,a duh dan anga an ram awmtir tura nawr luihna hman a tum dan zawk a ni, a ti.

President Trump bakah Senate Foreign Relations Committee member US senator Ted Cruz pawhin Nigeria ramah Kristiante beih a, thah an nih thu hi a sawi bawk. Bwala chuan Trump leh Cruz te chu report dik lo leh hlui tawh lutuk an ring a ni tiin, an ramah sakhaw bil beihna ang chi a thleng lo tih a sawi. Sovereign state an ni a, hruaitu pahnihte sawi anga an ram laka sipaite beihpui thlak tir ngawt theih pawh a ni lo tiin a sawi bawk.

Christian Association of Nigeria hruaitu hlui, Joseph Hayab pawhin an ramah Kristiante beihna a thleng nia sawi chu a dik lo tih a sawi ve bawk a, hemi rual hian tualchhung buaina thleng reng avanga nunna chan an awm fo titawp tura sorkarin nasa zawka hma a lak erawh a ṭul tih a sawi.

Nigeria ramah hian kum tam tak tualchhung buaina a thleng tawh a, buaina hi Kristian leh Muslim te pawhin an tuar vek a ni. Boko Haram firfiak pawl chettlatna, an ram hmar lamah buaina hi a nasa zual a ni.