Bali thuneituten tlang panga glass lift siam tihtawp tir

Indonesia-a Bali province thuneitute chuan Chinese developer, China Kaishi Group-in Kelingking Beach bul tlang panga darthlalang hmanga lift a siam chu a tihtawp tir.

Tlang panga lift siam hi beach tlawhtute tan awlsam zawka an kal theihna tura duan a ni a, mahse, hei hian tlang mawina a tihmelhem thei dawn nia ngaiin thuneitute chuan an hnathawh mek chu an tihtawp tir a ni. Kea kala tlang aṭanga tuipui kam thlen thlak nan hian minute 45 - 60 vel hun hman a ngai a, a chhoh lamah chuan darkar hnih dawnte an hmang thung.

Glass lift siamtute hian thuneitute lam aṭangin lift siam tura phalna kimchang pawh an nei lo tih hriatchhuah a ni bawk. He tlang hi 'T-Rex cliff' tih a ni a, tualchhung mite chuan lift siam hi an duh lo hle, social media lamah pawh sawiselna a tam hle a ni. Tualchhung mite chuan lift siam loin tlang aṭanga pan thlakna kawng chu siamṭha zawk tura an duh thu an sawi.

Kelingking Beach hi khualzinten an tlawh nasa hle a, mahse, a zim avang leh tuifawn na tak a thlen ṭhin avangin tui chen erawh phal a ni lo a, heti chung hian mi tam tak chu an cheng lui fo tho a ni.