Hamas-in Israel hnenah ruang 3 hlan leh

Hamas chuan Pathianni zan khan Red Cross kaltlangin Israel mi pathum ruang chu Israel sipaite hnenah an hlan leh. Ruang pathumte hi Israel-ah enfiah turin lak nghal an ni a, nimin zing khan forensic test neih hnuah Israel sipai pathum - Col Asaf Hamami, 40, Capt Omer Neutra, 21 leh Staff Sgt Oz Daniel, 19, te ruang an ni tih finfiah a ni.

Gaza Strip-a inkahhai an puanna hnuaiah Hamas hian Israel mi an man, thi tawhte ruang chu Israel hnenah hlan vek tura tih a ni. Ruang hlan tur hi 28 an awm a, Pathiannia an hlante nen hian mi pariat ruang hlan loh an la nei. Israel hian Gaza Strip-a indona thlen hnua Palestinian mi an thah ruang 360 chu Hamas hnenah a hlan ve tawh bawk.

Israel chuan ruang an kawlte hlan kir duh loah Hamas a puh reng a, hetih lai hian Hamas chuan indona avanga Gaza Strip a chhiat nasat tawh avangin ruang zawn hmuh hi a harsa niin a sawi ve thung.

Inkahhai thawh khatna kalpui mek a ni a, a thawh hnihna kalpui chhunzawmna tura inbiakna erawh neih a la ni lo.