2025-ah health aid fund 30% - 40% in tlahniam dawn : WHO

World Health Organisation (WHO) chuan kum 2025-ah ram hrang hrangten hriselna kaihhnawih thil atana ṭanpuina sum an pek chu kum 2023 nena khaikhinin 30%-40% velin a tlahniam dawn nia chhut a ni tih a sawi.

WHO chuan sum dawn zat tlahniam hian a bikin ram rethei, low and middle income countries (LMICs) health service a nghawng pawi dawn hle tih a sawi a, ram hrang hrang hruaitute chu sorkar budget siamah health policy chu dah pawimawh turin a ngen.

LMICs 108 data, kumin March thlaa lakkhawm a zirchiannaah, WHO chuan fund tihtawp hian service pawimawh zual - maternal care, vaccination, health emergency leh disease surveillance te chu ram tam takah 70% velin a tlakhniam phah niin a tarlang. Ram 50 chuangah healthcare worker tam takin an hna an chan phah a, health worker training programme te pawh a buai phah hle bawk tih a sawi. WHO director-general, Dr Tedros Adhanom Ghebreyesus chuan fund tihtawp thut chuan ram tam tak a nghawng a, nunna hialin a tawrh phah tih a sawi.

US leh ram dang ṭhenkhat, a bikin Europe ramten health funding an pek ṭhin an tihtawp leh an tihtlem avangin kum 2025 hi WHO hi kum 15 chhunga health fund a dawn tlem ber kum a ni. US president Donald Trump chuan kumin January thlaa President atana lak luh a nih hnuah US chu WHO aṭanga a inhnuhdawh pui tawh bakah, ram danga health aid programme an kalpuite a titawp bawk. US bakah Europe-a ram lian pakuate chuan health fund atana sum an pek an titlem bawk a ni.