Israel PM-in Rafah-a Hamas firfiak birute chhuah tir remti lo

Israel prime minister Benjamin Netanyahu-a office chuan Gaza Strip-a Israel Defence Force (IDF) thununna bial chhungah Hamas firfiak, leiverha birute chu him taka chhuah tir an remti dawn lo tih a sawi.

Report ṭhenkhatin Gaza Strip-a inkahhai puan a nih hnuah, Hamas firfiak birute hi him taka Gaza an chhuahsan phalsak an ni dawn tiin an sawi a ni. Mahse, hei hi chhangin, PM chuan an chhuahna tur kawng hawnsak an ni dawn lo tih a sawi a ni.

Israel chuan Gaza chhim lam, a bikin Rafah-a IDF thununna bial chhunga leiverh eng emaw zatah Hamas firfiak hi 200 vel an la biru niin a ngai. An awmna hmun aṭang hian Hamas thununna bial chhungah Israel sipaite hmuh lohin an relhru thei dawn lo nia sawi a ni. Thawhṭanni khan firfiakte hian an ralthuamte an dahthla a nih chuan IDF chuan an awmna hmun chu an chhuahsan an phalsak dawn tiin report ṭhenkhat chuan an tarlang.

National security minister Itamar Ben Gvir chuan report chu a dik lo tih sawiin, Yellow Line pela la awm, Hamas firfiak 200 te chu thah an nih loh chuan man vek a phut tih a sawi. IDF thununna bial chhunga an awm mek chu man theihna remchang tak a ni tiin, eng vang maha chhuah an ni tur a ni lo, a ti. Blue and White party hruaitu, Benny Gantz pawhin Hamas firfiakte chu leiverh aṭanga chhuah a, an pawl intelkhawm leh theihna tur remchang siamsak an ni tur a ni lo, a ti ve bawk. Prime minister hlui, Naftali Bennet chuan IDF sipaiten Rafah sector-a firfiak eng emaw zat an dangchep thei a, firfiakte hian inpek nge kahhlum an duh zawk tih an thlang mai tur a ni, tiin a sawi bawk. Heng firfiakte hian an kutah Israel mi thisen a kai a, a ṭhen chu October 7-a Israel beihnaah pawh khan an tel mai thei a ni, a ti.