Nepal-ah vur tawlh vangin mi 3 an thi

Nepal hmarchhak lama Yalung Ri tlangah Thawhṭanni khan vur nasa takin a tawlh a, tlang lawn mi pathum an thi a, chin hriat lohin pali an awm. Thi zingah ram dang mi a tel.

Tlang chhip aṭanga metre 5,630-a hniama awm, base camp thlengin vur hi a tawlh a ni. Yalung Ri tlang hi Dolakha district-a Rowaling Valley-a awm a ni.

Deputy superintendent of police, Gyan Kumar Mahato chuan vur tawlh vanga thite hi France ram aṭanga tlang lawn tura kal leh amah hruaitu Nepali guide pahnih an nih thu a sawi. Hetih lai hian tualchhung media chuan thi zat hi pasarih niin an tarlang thung. Expedition team-ah hian mi 12 an awm a, ram dang mi vek tlang lawn mi panga leh Nepali guide pasarih an ni. Tlang lawn tura mi palite hi an chin hriat an la ni lo.

Armed Police Force leh Nepal Police chuan helicopter nen chhanchhuah hna an thawk a; mahse, khua a ṭhat tawk loh avangin duh angin an thawk chak thei lo tih DSP Mahato chuan a sawi.