Philippine-ah thlipui tleh vanga thi 52 an tling

Philippine rama Thawhlehnia thlipui, typhoon Kalmaegi tlehin chhiatna nasa tak a thlena thi chu mi 52 an tling tawh. Official-te chuan report kimchang an la dawn loh avangin thi zat pawh hi an la pun chhoh a rinawm thu an sawi.

Typhoon Kalmaegi tleh leh ruah nasa taka a sur bawk avangin Cebu province-ah chhiatna a thleng nasa hle. Tuilianin motor tam tak a hnawl a, kawtthlerte tuilianin chimin chenna in eng emaw zat a chim tel bawk.

Thawhlehnia thlipui tleh vanga harsatna tawkte ṭanpui hna thawk tura tirh, air force helicopter chu Agusan del Sur province-ah chesualin a tla a, mi paruk an thi. Helicopter chetsual chhan hi sawichian a la ni lo.

Philippine Red Cross chuan tuilianin an in a chim avanga in chung lama tlanchhia, chhanchhuah ngaite aṭangin call tam tak an dawng tih an sawi. Mahse, tui hi a kam deuh loh chuan chhanchhuah hna hi thawh mai theih a ni lo tih an tarlang.

Thlipui tleh leh ruah sur hi Cebu province-in a tuar nasa ber a, province pumah state of calamity puan a ni bawk. Cebu province-ah hian September 30 khan magnitude 6.9-a naa lir a nghin avangin mi tam tak an thi a, chenna in chhia sang tel a awm bawk a ni. Lirnghingin an in a tihchhiat avangin mi ṭhahnem tak chu puan-inahte an la khawsa a, hetih mek laiin thlipui leh tuilian hi an tuar zui leh ta a ni.