Hamas-in Israel hnenah ruang pakhat hlan leh

Palestinian firfiak pawl, Hamas chuan Thawhlehni khan Gaza-ah Red Cross kaltlangin Israel hnenah ruang pakhat a hlan leh. Hamas hian Ocotber 7, 2023-a Israel an beih ṭuma an man, thi tawhte ruang 28 zinga 21 a hlan tawh.

Israel Prime Minister Office chuan Hamas in ruang a hlan thar ber hi endik a nih hnuah Staff Sergeant Itay Chen ruang a ni tih finfiah a nih thu a tarlang. Hamas chuan ruang hi Gaza City khawchhak lam, Shjejai-ah hmuh a nih thu an sawi. He hmun hi Israel sipaite thununna hnuaiah a la awm a, anni hian ruang zawng turin Hamas leh Red Cross team an luh an phalsak a ni.

October 10 aṭanga hman ṭan, Gaza Strip-a Israel leh Hamas ten inkahhai an puanah, an inremna thuthlungah Hamas chu Israel mi an man thi tawh, mi 28 ruang hlan vek tura tih an ni. Israel hian October 2023-a Gaza Strip-a indona a thlen hnua Palestinian mi an thah, mi 270 te ruang a hlan tawh bawk.

October 7,2023-a Hamas-ten Israel an beih ṭum khan Chen hi kum 19 mi a ni a, Gaza ramria military base-ah a thawh lai a ni. Hamas hian manin Gaza-ah an that zui niin a tir lamah chuan rin a ni. Mahse, kum 2024 March thla khan Israel chuan Chen hi October 7-ah a thi a, Hamas-te hian a ruang hi Gaza-ah an la tih an sawi.

Hamas-in Israel hnena ruang hlan tur a la neih, pasarih zinga panga chu Israel mi an ni a, pakhat chu Tanzania mi niin Thailand mi pakhat a tel bawk.