China-in Myanmar gang member 5 thi tura hremna pe

China court chuan Thawhlehni khan Myanmar-a Kokang region leh a chhehvela inbumna, scam operation kalpuinaa inhnamhnawih, gang member panga chu thi turin an chungthu a relsak.

Myanmar ramriah hian scam centre eng emaw zat a awm a, heng hmunah hian ram dang mi tam tak an thawk. Ram dang mi thawk zingah hian Chinese pawh an ṭhahnem hle a, an zinga tam tak chuan bum luh an nih thu an sawi.

China hian ramri chhehvela scam centre awmte dap chhuakin beihpui a thlak chhunzawm reng a, centre-a thawk China mi eng emaw zat chu thawn kir an ni tawh bawk.

Shenzen court-in thi tura hremna a pek mi pangate hi China mi paruk thihna leh, mi pakhat intihhlum chhan leh mi tam tak hliam an tuarnaa mawhphurtua puh an ni. An gang hian Kokang region-ah compound 41 siamin, dan kalha thiltihna hrang hrang an kalpui nia puh an ni. Court hian gang member panga chu dam chhung tang turin a hrem a, kum 3-20 tang tura hrem mi pakua an awm bawk a ni.

Kumin April thla khan United Nations chuan cyber scam centre aṭangin China leh Southeast Asia gang-te chuan dollar tluklehdingawn tel an la lut tih a lo sawi tawh. He industry hi South America, Africa, Middle East, Europe, leh Pacific Islands ahte a darh tawh niin UN Office on Drugs and Crime chuan a tarlang.