Pakistan-in ram danpui siamṭhat a tum

Pakistan sorkar chuan an ram danpui siamṭhat a tum a, sipai hnenah thuneihna tam zawk pek an tum dawn nia tarlan a ni.

Prime minister Shehbaz Sharif kaihhruai chuan Parliament-ah 27th constitutional amendment pharh thuai a tum tih a sawi tawh a, hetah hian armed force hotu thuneihna sang zawk pek rawtna a awm a ni. Sawiseltu lam chuan danpui siamṭhat tum dan hi an ngaimawh nghal hle.

Deputy prime minister leh foreign minister Ishaq Dar chuan Senate-ah danpui siamṭhat an tum thu hi a sawichiang tawh. Eptu party, Pakistan Tehreek-e-Insaf (PTI) in kalphung zawm loa danpui siam danglam an tum nia an puhna chu a dik lo tih sawiin, vote lak vek a ni dawn a, an duh dan ang anga an siam mai theih a ni lo tih a sawi.

Pakistan media-te chuan 27th Amendment hnuaia danpui siamṭhat tumnaah hian Army Chief leh command of armed force ruat an nih dan tur tarlanna, Article 243 chu thlak a ni dawn niin an sawi.

Danpui siamṭhatna tur hi Parliament-ah put luh a nih hnuah, pass turin Senate leh National Assembly (NA)-ah member hmun thuma ṭhena hmun hnihten an pawm a ngai dawn. Sorkar hian member 366 awmna NA-ah thlawptu 233 a nei a, a tlang thei dawn a ni. Mahse, member 96 awmna Senate-ah thlawptu 61 a nei a, pass tur chuan eptu member pathum vote an hmuh tel a ngai ang. PTI hruaitu Hamid Khan chuan danpui siamṭhat tumna hi an party-in a thlawp dawn lo tih a sawi tawh a, sorkar hmalakna chu a hlawhtlin lohna tura beih an tum thu a tarlang.