Boeing 777X enchhinna hmasa ber neih a ni

Kar kal ta Inrinni khan engine pahnih hmang thlawhtheihna  zinga lian ber, Boeing 777X chu a ṭha tawk em tih leh mipuite rin ngam tur a ni dawn em, tih enchhinna hmasa ber neih a ni.

Washington-a Everett hmun aṭang he thlawhtheihna hi a thlawk chhuak a, Seattle khuaa Boeing Field hmunah a ṭum leh a ni.

Darkar li chhung a thlawh nan hian hun a hmang a ni. He thlawhtheihna hi kar liam ta Ninganni leh Zirtawpni khan enchhinna hmasa ber neih tum a ni tawh a, mahse khawchhiat avangin ṭulh a nih hnuah  Inrinni khan enchhinna hmasa ber chu neih a ni thei ta a ni.  

Kum 2018 leh 2019 inkar khan Boeing 737 MAX chetsualna thlengah mi 346 in nunna an chan a, Ethiopia leh Indonesia rama 737 MAX te chetsual hnu khan Boeing chuan 737 MAX  thlawhtheihna hi a thlawh tir tawh rih lo a ni. 

Chhiatna thleng vang hian mipui rin an hlawh tawh lo a, mahse mipuite rin leh theih turin Boeing company chuan theihtawp an chhuah mek a, tuna an thlawhtheihna thar pawh hi a ṭha thei ang bera an siam a ni. Boeing 777X hian fuel a hman tlem dawn bakah, engine pahnih a hmang dawn a, 10% ve vein boruaka fuel leh emission cham tur a titlem thei dawn bawk.

Boeing thlawhtheihna siam chhuah tawhah chuan Boeing 777X hi an thlawhtheihnaa lian ber tur a ni a, a len lam hi feet 235 a ni. He thlawhtheihna service theih hun tur hi nakkum lam daih a nih tur thu tarlan a ni a, tunah hian regulatory approval an nghak mek a ni.