Pakistan leh Afghanistan sipaite inkap leh

Pakistan leh Afghanistan ram aiawhten Istanbul-a inremna zawnga inbiakna an neih mek laiin, Ningani khan ramria an sipaite an inkap leh.

Afghanistan border town, Spin Boldak bujlah ram pahnih sipaite hi an inkap leh a, thi leh hliam an awm leh awm loh erawh report a awm lo. Ram pahnihte hian inkahhai an puan mek bawhchhe hmasaah an inpuh tawn a ni.

October thla tir lam khan ramriah sipaite hi an inkap tawh a, mi eng emaw zat an thi a ni. October 19-ah Doha-ah ram aiawhte inbiain, inkahhai puanna tur inremna an ziak a ni. Hun rei zawka inremna siam chhunzawm dan ngaihtuahin kar liam ta kartawp khan Instanbul-ah inbiakna neih chhunzawm a ni a, inbiakna neih mek karah sipaite hi an lo inkap leh a ni. Afghanistan chuan Pakisan sipaite hian an kap hmasa niin an sawi a; mahse, Pakistan lam chuan hei hi phain Aghanistan chuan an bei hmasa niin an sawi ve thung.

Ram pahnih aiawhte inbiaknaah Pakistan lam hi military intelligence wing hotu, Asim Malik-a'n a ho a, Afghanistan palaite hi intelligence chief, Abul Haq Wasiq-a'n a ho bawk.

Pakistan leh Afghanistan hian kum tam tak inlaichinna ṭha tak an lo nei tawh ṭhin a, Afghanistan-a Taliban in thuneihna an chelh thar leh hnuah an inkar boruak hi a chhe chhoa ni. Pakistan chuan Taliban sorkar chu firfiak pawl, Pakistan sipaite bei ṭhintu Pakistan Taliban thlawpah a puh a, mahse, Taliban chuan hei hi a pha thung.