Kazakhstan in 'Abraham Accords' zawm dawn

Kazakhstan ram chuan Israel leh Arab ram ṭhenkhatin thawh hona tura inremna an siam, 'Abaraham Accords' tia sawi chu a zawm ve dawn tih a sawi. Kazakhstan hian Israel nen kum 33 chhung inzawmna siam tawhin, Israel ram pawh a hma daihin a lo pawm tawh a ni.

Ningania US president Donald Trump leh Central Asian ram hruaituten meeting an neih hma lawkin, Kazakhstan sorkar chuan Abraham Accords an zawm ve tur thu hi a puang a ni. Kazakhstan leh Israel hi inzawmna ṭha tak nei tawh sa an ni a, inremna an zawm ve hian an inkar dinhmun a siamṭhat belh dan tur erawh a la hriatthiam mai theih loh. Kum 1992-a Soviet Union aṭanga Kazakhstan-in independence a hmuh hnu lawkah Israel nen hian palai pawh an intir tawn nghal a ni. Kum 2016 khan Israel prime minister Benjamin Netanyahu chuan Kazakhstan hi a lo tlawh tawh bawk a, ram pahnihte hian thawh dunna inremna pawh eng emaw zat an siam.

Israel leh Arab ramte inremna siam, Abaram Accords hi US president Donald Trump-a'n a president term hmasaa a hmalakna hnuaia siam a ni. Israel leh Arab ram pathum UAE, Bahrain leh Morocco chuan kum 2020 khan inremna hi an siam a ni. President Trump chuan Arab ram dangte pawha accords hi an la zawm ve thuai a rin thu a sawi a, Saudi Arabia pawhin an zawm a beisei thute a lo sawi lang tawh a ni.