US-in Carribean-ah ruihhlo phurtu lawng kap

US sipaite chuan Ningani khan Carribean tuipuia ruihhlo tawlhna atana hman nia sawi lawng an kap a, lawnga chuang mi pathum an thi tih Pentagon hotu, Pete Hegseth chuan a sawi.

September thla tir aṭang khan ruihhlo do campaign a kalpuinaah US hian Carribean leh Pacific tuipuia ruihhlo phurtu lawng 18 a kap tawh a, lawng beihnaah hian ruihhlo tawlhnaa inhnamhnawih mi 70 an thi tawh a ni.

Hegseth chuan ruihhlo phurtu lawng an kah hnuhnung berna hi international water-ah a ni tih sawiin, he lawng hi firfiak pawl pakhat enkawl a nih thu a sawi. Inbeihnaah hian US sipai thi an awm lo tih a tarlang bawk. "Ruihhloa sumdawng, kan ram himna tiderthawngtute chu an la dam zel duh a nih chuan ruihhlo tawlh an bansan a ngai. Ruihhlo in rawn tawlh zel a nih chuan, kan that zel dawn che u," tiin X-ah a tarlang.

President Donald Trump kaihhruai sorkar chuan ruihhlo tawlh ṭhinte dan hna kalpuina atan Latin America-ah a sipaite pawh a thuam chak a, Carribean-ah Navy lawng paruk dahin, Puerto Rico-ah F-35 stealth warplane a dah bawk. October thla laihawl aṭang khan Venezuela ram bulah US bomber-te pawh vawi li vel tirh an lo ni tawh bawk.