Syria President US-ah a zin, Trump nen inhmu dawn

Syria president Ahmed al-Sharaa chu Inrinni liam ta khan US-ah a zin a, vawiin hian US president Donald Trump nen White House-ah inkawm ang.

President Sharaa hi US a pan hma ni hian US State Deparmtent chuan terrorism blacklist aṭangin a paih a ni a, ani baka Syria inteirior minister Anas Khattab pawh list aṭangin paih a ni bawk. Sharaa hi kum 1946-a Syria ramin independence a hmuh hnua Syria president zinga US-a zin hmasa ber a ni. November 6 khan Brazil-ah COP30 Climate Summit a hmang a, summit zawhah US lam hi a pan a ni.

May thlaa Trump-a'n regional tour a nih ṭum khan, Sharaa nen hian Riyadh-ah a ṭum khatna atan an lo inhmu tawh a ni.

Muhammad al-Jawlani tia hriat ṭhin, Sharaa hian al-Qaida nena inzawm, Hayat Tahrir al-Sham (HTS) a kaihruai ṭhin a, mahse kum 2016-ah an inzawmna a titawp a ni. Syria president a nih hnuah, Sharaa hian an rama pawikhawihna thleng fo tihtawp leh, khawthlang ramte nena inlaichinna ṭha zawk siam tumin hma a la chho a ni.

Syria-a US palai, Tom Barrack chuan Sharaa hian US kaihhruaia ṭangrual ramten Islamic State (IS) firfiak pawl laka beihpui an thlaknaah an ram tel ve tura inremna pawh a la ziah a beisei thu a lo sawi tawh a ni. US hian Damascus bulah military base siam a tum nia sawi a ni bawk.