New Zealand-a national park a kang

New Zealand-a central North Island-a Tongariro National Park-ah ram nasa takin a kang a, nimin thleng khan ram hectare 1,100 vela zau a kang tawh.

Tongariro National Park hi hiking spot lar tak a ni a, ram a kan hnuah Inrinni khan hiker 40 chu thlawhthehna hmangin hruaichhuah niin, nimin khan mi pakua hruai chhuah an ni leh bawk. Nimin khan ram kang ṭhelh tur hian kangṭhelhtute bakah thlawhtheihna tam zawk tirh a ni a, helicopter pariat leh aircraft pathum hmangin a ṭhelh hna thawh mek a ni.

Fire and Emergency New Zealand assistant commander Craig Gold chuan ram kang hi a darh chak thu leh, tlang pang a nih avangin lei lama ṭhelhtu tirh belh ai chuan chung lam aṭanga ṭhelh tur, thlawhtheihna tam zawk hman chu awmzia a nei zawk niin a sawi. Hetih lai hian lei lam aṭangin kangṭhelh motor paruk leh tanker panga hmangin ṭhelh hna hi thawh reng a ni bawk.

Ram kang hian infrastructure tihchhiah a la nei lo a, a chhehvela chengte fimkhur tura hriattir ni mah se insawnchhuak tura tih an la ni lo. Kangmei chhuah chhan tak hi hriat a la ni lo bawk a, specialist wildfire investigator chuan nimin aṭang khan a chhui chiang ṭan a ni.