SKorea President hlui thubuai siam belh sak

South Korea president aṭang paihthlak, kum 2024 December thlaa an rama sipai hnena thuneihna sang pekna tur, martial law a puan avanga jail-a tang mek, Yoon Suk Yeol chu nimin khan martial law a puan kaihhnawihah thubuai dang an siam belh sak.

Prosecutor-te chuan Yoon hian nikuma martial law a puan hma a, a puanna chhan chhuanlam atana hman turin North Korea ram lamah drone a thlawh tir niin an sawi. Yoon hian December 3, 2024 khan martial law puangin, an ram parliament, National Assembly chu sipaite a ventir zui nghal bawk. Mahse, a thiltih hi sorkara a thawhpui leh a party mi leh sate ngei pawhin an thlawp lo a, President a nihna aṭanga paihthlak niin, helna chawhchhuah tumna kawnga a meizanghlaptu nia puhin thubuai siamsak a ni a, jail-ah a tang mek a ni. A thubuaiah hian thiam loh chantir a nih chuan thi tura hremna pek theih a ni ang.

Yoon leh a defence official hlui pahnihte chu NKorea rama drone an thlawh luh tir chungchangah an hmelmate hamṭhatna tur zawka cheah leh, an thuneihna dik lo taka hmangah puh an ni tih special investigation team chuan a tarlang.

Nikum December thlaa martial law a puan khan Yoon hian NKorea sipaite an ram tan an hlauhawmin, an ram dinhmun a derthawng niin a puan chhanah a sawi. Mahse, hei hi Parliament-ah a agenda dodaltute beih leh a, official-te paihthlak leh sorkar budget tihtlem tumna hmanrua atana hman a tum nia puh let a ni thung. Yoon hian National Assembly chu misual rual leh sorkar duh dan dodaltute awmkhawmna tiin a sawi.