US leh Israel-in Gaza-a inkahhai chhunzawm dan tur sawi

Israel prime minister Benjamin Netanyahu leh US mediator, Jared Kushner-te chu Thawhṭanni khan inhmuin, Gaza Strip-a inkahhai thawh hnihna neih dan tur chungchang an sawi dun.

US president Donald Trump rawtna siam hnuaiah, Israel leh Hamas hian October 10 aṭang khan Gaza Strip-ah inkahhai an puang a, mahse, an inremna bawhchhiaah an inpuh tawn fo a ni.

Inremna an siamah hian Hamas-in Israel mi a hren mek, nungdama awm leh thi tawhte ruang Israel hnena hlan vek tura tih a ni. Nungdama awmte chu chhuah an ni vek tawh a; mahse, ruang 28 hlan tura tih erawh a la hlan kim thei lo. Ruang 24 hlan tawhin an zinga mi 21 te chu Israel mi an ni. Ruang an hlante hi October 7, 2023-a Israel an beih ṭuma an mante an ni. Israel hian an ram jail hrang hranga tang, Palestinian mi 2,000 dawn a chhuah tawh bakah, Palestinian mi an kahhlum ruang 315 chu Gaza thuneitute kutah a hlan tawh bawk.

Hamas thupuangtu, Hazem Qasim chuan Israel chuan Gaza hmarlama 'Yellow Line' huam chin chu zauh zel niin a puh a, hei bakah tun hnaiah Israel hian hmun hrang hrangah Hamas lakah beihpui thlak lehin, hei hi an inremna bawhchhiatna a ni, a ti. Israel sipaite chuan Yellow Line pel chinte an bei niin a sawi thung.