Thailand-in Cambodia nena inkahhai an puan titawp dawn

Thailand sorkar chuan thla hmasaa Cambodia nena inkahhai an puan chu a titawp dawn tih a sawi a, US leh ASEAN bloc chair ni mek, Malaysia hnenah pawh a thutlukna siam chhan hi a hrilhfiah tur thu a tarlang.

Thailand leh Cambodia sipaite hi July thla khan ramriah inkapin, mi 40 chuangin an thih phah bakah, ramri biala cheng hmun him lama tlanchhia mi nuai thum dawn an awm bawk. Hemi hnu hian US president Donald Trump nawrnain inkahhai an puang a, kar hnih liam ta khan Trump telpuina hnuaiah Thailand prime minister Anutin Charnvirakul leh Cambodia prime minister Hun Manet te chuan inremna pawh an lo ziak fel tawh a ni.

Inremna an ziah aṭanga rei lo te hnuah Thailand hian inkahhai puan a tihtawp tur hi a puang leh ta a ni. Cambodia ramri bul, Sisaket province-a palpuah bomb puaka an sipaite an hliam hnuah sorkar hian inremna an tihtawp tur thu hi a puang a ni. PM Anutin chuan sipai hliam tuarte hi tlawh thuai a tum tih a sawi bawk.

Cambodia defence ministry chuan nimin khan thuchhuah siam ve bawkin, palpuah bomb kamtu an nih loh thu leh, palpuah bomb awmna bial huam chhungah Thailand chu a sipaite kal tir lo turin a ti. Mahse, Thailand chuan Cambodia phatna hi an pawm lo tih an sawi ve thung.