Iraq Parliament inthlanpui nei

Iraq Parliament inthlan chu nimin khan neih a ni a, Parliament member 329 thlan chhuah an ni dawn. Seat awm zat aṭanga 25% hi hmeichhe chanpual a ni ang.

Pathianni khan security mi leh sa bakah, buaina avanga hmun danga tlanchhia mi 26,000 ten vote an thlak hmasa a, nimin khan mi dangin vote an thlak thung. Zing dar 7 aṭangin vote thlak ṭan a ni a, zan dar 6 thleng hun hawn a ni.

Inthlan hi ballot paper hmanga neih a ni a, Parliament member 329 thlan turah hian candidate 7,744 an awm. Vote nei mi mtd 21.4 vel an awm bawk. Inthlan hnuhnung ber, kum 2021-ah khan vote a tla ṭha lo hle a, 41% vel chauh a ni pha. Observer leh analyst-te chuan kumin inthlanah hian 2021 aiin vote a tlak chhiat zawk an rin thu an tarlang.