US House-in "Uighur Act 2019 bill" pawm

United States House of Representatives (lower house) chuan an ni huna Thawlehni zan khan, "The Uighur Human Rights Policy Act 2019 bill" chu pass-in, China sorkar senior official laka hrekna a siam zui.

He bill hi pass a nih chhan ber pakhat chu China hmarthlang lama awm Xinjiang biala Turkic ethnic minority group "Uighur" leh Muslim mi­nority-te chunga China chet­dan chungchanga US a lungawi loh vang a ni. Xinjiang biala awmte lakah hian China sorkar chu a inluling hle nia sawi a ni. Minority-te hi khung hran an nih thu leh mihring dikna leh chanvo rahbeh sakah US hian China hi a puh bawk. Hei vang hian October thla khan Chinese Company 28-te chu blacklist-ah an telh thu US Commerce Department chuan a lo puang tawh bawk. 

Bill hi Senate (upper house) pawmpuina leh President Donald Trump-a hming sign a ngai leh phawt dawn a, he thil pahnih hi a kaltlang chuan bill hi 'law' a ni tawh ang. US House of Representatives-a "The Uighur Human Rights Policy Act 2019 bill" pass a nih hian a duhtu pawl lamah vote 407 a tla a, a duh lo lamah hian Kentucky bial aṭanga member Republican, Thomas Massie-a vote 1 chiah a awm thung.

China hian an ram Xinjiang biala Uighur  leh Muslim minority-te camp-a khunghrana an puhna chu a pha a, mahse 'vocational training school'-a an awm thu erawh a sawi thung. 

Xinjiang bialah hian tharum thawhna, firfiaka inbeihna leh China laka awm hran duhnate a hluar avangin China sorkar chuan helai biala hma­lakna a neih thu thuchhuah a siam. November thla tawp khan Trump chuan Hong Kong-a sorkar laka lungawi lohna lantira nawrh huai­hawt mekte thlawpna, Human Rights and Democracy Act chu China President Xi Jinping leh Hong Kong mipuite zah tak chungin, law-a chantir turin a hming a sign hnan tih a lo sawi tawh bawk.