Syria national museum aṭangin mi lim paruk ru bo

Syria khawpui, Damascus-a National Museum of Damascus chu misualten rawkin, Roman era ami, mi lim paruk zet chu an ru.

Museum aṭanga hmanlai mi lim ruk chhuah an ni tih hi Thawhṭanni khan hriat chhuah a ni a, museum pawh khar nghal a ni. He museum hi Syria rama museum lian ber a ni a, hmanlai thil hlu tam tak a awm a ni. Kum 2011 March thlaa tualchhung indona a thlen hnuah venhimna lam pawh thuam chak a ni a, metal gate siamin surveillance camera dah a ni. Ram chhung hmun hrang hrang aṭangin hmanlai thil hlu tam tak chu he hmunah hian dah luh a ni bawk.

Directorate-General for Antiquities and Museums official chuan rukrute hian marble hmanga siam mi lim paruk an ru chhuak tih sawiin, chhuizui mek a nih thu a sawi. Pathianni zana an ruk chhuah a nih thu leh, classical department-a kawngka pakhat chu tih chhiat a nih thu a tarlang. Damascus-a police hotu, brigadier general Osama Atkeh chuan museum vengtute leh mi dang eng emaw zat thu zawhfiah an nih thu a sawi.

Mi lim rukbo te hi Hellenistic, Roman leh Byzantine hunlaia thil hlu tak tak an dahkhawmna hmuna mi an ni.