UK-ah NATO 2019 summit hmang

North Atlantic Treaty Organization (NATO) din champa vawi 70-na pualin Thawhlehni leh Nilaini khan United King­dom (UK) ah special anniversary summit neih a ni. 

NATO 2019 summit hi London bula Watford, herts ah neih a ni. NATO-ah hian member ram 29 an awm a, heng rama mipui awm zat hi maktaduai 900 chuang an tling. He pawl hi khawvela sipaite thawhhona pawl lian leh thiltithei ber nia sawi ṭhin a ni. 

Kum 1949 khan North Atlantic Treaty ziakin NATO hi din a ni a, a tirah chuan member ram 12 - Belgium, Canada, Den­mark, France, Iceland, Italy, Luxembourg, the Nether­lands, Norway, Portugal, UK leh  US an awm. Mem­ber hi pun belh zelin, tunah chuan member ram hi 29 an awm tawh a ni. 

Summit-ah hian Syria hmarlama Turkey sipaite chet dan, member ramten a sipaite thuam chakna tura a sum sen dan chung­changah member te ngaihdan a inang lo hle. Tunhnaia France Pre­sident Emmanuel Macron-a'n NATO chu ngaih­tuahna thluak thi tawh ang mai tia a sawi chuan sawizui pawh a hlawh hle. 

US President Donald Trump chuan member ramten NATO budget atana an sum pek inthlauh dan chu a lo sawisel fo tawh a, hei vang hian summit ṭan hma lawk hian NATO secretary gene­ral Jens Stoltenberg chuan member-te sum pek dan system chu a lo siam dang­lam thu a sawi. 

US-in NATO budget atana a thawh chu tihtlem sak niin, ram dang ṭhen­khat sum pek tur zat erawh tihpun a ni thung.