Burkina Faso-ah firfiak 20 that
Burkina Faso-a inbeihna ṭum hnih thlengah firfiak 20 thah an nih bakah sipai pathum an thi bawk tih an ram sipai official-te chuan Thawhlehni khan an sawi.
Thawhlehni zing dar 2 velah khan Banh hmar lamah leh Toeni hmarthlang lamah sipaite hian firfiak awmna an bei niin an tarlang a ni. Burkina Faso hian 2015 aṭang khan tharum thawhna an tuar nasa hle a, Pathianni liam ta mai pawh khan Niger nena an inrina bula khuaah mi pakhat silai keng chuan biak-ina inkhawmte beiin mi 14 an thi a, eng emaw zat an hliam bawk.
An ram hmar lamah hian venhimna kalpuina kawngah harsatna an tawk nasa zual a, nitin deuh thaw inbeihna thlengin thi pawh an tam tawh hle. Kum 2015 aṭanga vawiin thleng hian firfiakte pawikhawihnaah hian Burkina Faso ram chhungah mi 500 chuang an thi tawh nia hriat a ni. Thi zingah hian sipai 200 an tel a, mi tam tak chu Africa ram thlang lamah inhumhimna zawngin an kal tawh bawk a ni.