Mexico-a nawrh huaihawtnaa buaina chhuakah mi 120 hliam

Mexico khawpui, Mexico City-ah Inrinnni liam ta khan an rama pawikhawihna thleng hluar zel duh lohna leh, president Claudia Sheibaum kaihhruai sorkar laka lungawi lohna lantirin nawrh huaihawt a ni. Nawrh huaihawtte leh police-te innawr buainaah mi 120 velin hliam an tuar a, an zinga mi 100 chu police officer an ni.

Lungawi lohna lantira kawng zawh hi Gen Z group huaihawta neih a ni a, Mexico City bakah khawpui dangah pawh neih a ni. Tun hnaia ruihhlo tawlhru pawl hrang hrang laka na taka hma la tura phuttu, Uruapan mayor Carlos Manzo kahhlum a nih avanga lungawi lo tam takin nawrh huaihawt hi an thlawp a ni. Manzo hi November 1 khan Day of the Dead festival a hmanpuinaah kah hlum a ni. Ruihhlo tawlhruk pawl dodaltu leh pawikhawihna an thlen ṭhin dodaltu leh langsar taka sawisel ngam a ni.

Hetih lai hian president Sheinbaum chuan nawrh huaihawtna tur hian a kaihhruai sorkar duh lotu, right-wing politician hoin sum an thawh niin a puh.

Mexico City-a nawrh huaihawtte hian President chenna, National Palace venna siamte an tichhia a, police-ten hnawh darh nan tear gas an hmang. Nawrh huaihawt zinga mi 20 chu rukruk leh mi kutthlak vangin man an ni bawk tih Mexico City security chief Pablo Vazquez chuan a sawi.