Philippines-ah eirukna duh lohna lantir chhunzawm

Philippines sorkar hnuaia tuilian venna tur project thawhna kawnga eirukna tam tak awm nia sawi chungchangah, nimin khan an ram khawpui Manila-ah a ni hnihna atan mi sing telin lungawi lohna an lantir chhunzawm.

Infrastructure project lian tham eng emaw zat thawhnaah thil dik tawk lo awm avanga lungawi lohna lantir hi member mtd 2 vel nei, Igelsia NI Cristo kohhran huiahawt a ni. Pathianni aṭang khan nawrh hi huaihawt ṭanin mi nuai ruk vel an pungkhawm a, vawiin thlengin neih chhunzawm a ni ang. Manila bakah khawpui dangah pawh nawrh hi huaihawt a ni.

Kumin August thla khan president Ferdinand Marcos Jr chuan flood-control project audit neihnaah thil dik lo leh fel tawk lo eng emaw zat hmuh chhuah a nih thu a lo sawi tawh a ni. President hian heng project thawhnaa eirukna tam tak awm nia sawi chhui chiang tur commission a din a ni, thil dik lo tihnaa inhnamhnawihte chu man ngei an nih tur thu a sawi.

Hetih lai hian President-in a din commission hian thil dik lo haichhuah kawngah hna a thawk muang lutuk tiin mipui chuan an puh a, ni tam tak a ral hnuah pawh engmah chhui chhuah tak tak la nei loin, dik lo taka thil titute pawh man chhuah an la awm lo tiin an sawi a ni. Hei vang hian chak zawka hma la a, thil tisualtute man chhuah ngei phutin lungawi lohna an lantir a ni.