Saudia Arabia-ah bus leh tanker insu, mi 45 an thi

Saudi Arabia-ah nimin zing dar 1.30 khan Mecca aṭanga Madina pan, khualzin phurtu bus leh oil tanker an insu a, mi 45 an thi. Thi zinga mi 42 hi India mi, Mecca-a biakzina kalte an ni.

Bus-a chuangte hi Mecca-ah biakzin a kal niin, hun an hmang zo Medina lama an kir leh lamah tanker nen hian a insu a, bus hi a kang zui a ni. Chetsualna thlen lai hian bus-a chuang tam zawk hi an muhil a, bus a kan zui bawk avangin tlanchhuahna hun an nei hman lo nia sawi a ni. Thi zingah hian hmeichhia 11 leh naupang 10 an tel nia sawi a ni bawk.

Chhanchhuah hna thawktute chuan bus hi a kang chhe vek niin an sawi a, thite pawh an kan nasat avangin tunge an ni tih pawh hriat a harsa hle tih an tarlang. Bus-a chuang zinga pakhat chu a dam chhuak a, damdawi-inah enkawl mek nia sawi a ni a, a dinhmun erawh sawichian a ni lo.

Motor insua thi, India mi 43 zinga a tam zawk chu Hyderabad, Telangana aṭang kal an ni. Telangana sorkar pawhin Riyadh-a Indian Embassy pawh a bepawp nghal tih chief minister Revanth Reddy chuan a sawi.