China leh Japan inkar ṭha lo, mi nuai 5 dawnin Japan zin tur ṭhulh

Taiwan chungchang avanga tun hnaia China leh Japan inkar boruak ṭha lo avangin, China aṭanga Japan rama zin tum mi nuai 5 dawn chuan an zin tur an ṭhulh. China rama Japanese film lar pahnih tlangzarh tur pawh ṭhulh a ni bawk a ni.

November 7 khan Japan prime minister, Sanae Takaichi chuan Chian-in Taiwan awp tuma a bei a nih chuan Japan inrawlhin, an sipaite tirh an ni ang tiin a sawi ni. Hei hi China sorkar chuan a helh hle a, Pathianni khan Taiwan Strait-a Japan in a sipaite a inrawlh tir a nih chuan Japan ram pum chu indona hmunah a chantir tihna a ni ang, tiin an vau leh ve nghal bawk.

China chuan Japan nen an inkar boruak a ṭhat loh chhoh avangin an mi leh sate chu Japan rama zin lo turin thurawn a tichhuak nghal a, airline hrang hrangte chuan Japan zin tuma ticket la tawhte pawh a full-a refund an nih tur thu an sawi a ni. Hemi hnu, Inrinni leh Pathianni ringawt khan flight ticket cancel hi nuai 4 dawn an tling hman a ni. China hi tourism lama Japan-in sum a hmuhna pui ber niin, kumin January-September thla chhung khan China aṭanga an ram tlawhtu khualzin hi mtd 7.5 an tling hman a ni. China sorkar hmalakna avang hian Japan tourism, airline leh retail stock te pawh a tlahniam nghal nasa hle.

Japan sorkar chuan China nena an inkar boruak siamṭhat dan ngaihtuah nghalin, Thawhṭanni khan foreign ministery official Massaki Kanai chu China-ah a tir a, China ram hotute a be dawn a ni. Beijing-a Japan embassy chuan ram pahnih inkar boruak ṭha lo vang hian China-a Japan mi awmte chu fimkhur tura chahin, mahni zin chhuak lo turin a chah. China-ah hian Japan mi nuai 1 bawr vel an awm niin Japan foreign ministry chuan a tarlang.