Conservative party president candidate tur Fillon

France President thlanna neih tura conservative party candidate chuhnaah Francois Fillon chuan a khingpui Alain Juppe chu a hneh.

Pathianni khan Republican party candidate tur thlan thawh hnihna hi neih a ni a, hetah hian inthlan thawh khatnaa candidate zinga vote hmu sang pahnihte an inbitum a ni. Inthlan thawh khatnaah khan President hlui Nicolas Sarkozy pawhin a chuh a, mahse pathumna chauh a nih phak avangin inthlan thawh hnihnaah a chuh pha ve ta lo a ni. Inthlan thawh hnihnaah hian Fillon hian vote tla aṭangin 67% dawn a hmu pha a, party candidate a ni dawn ta a ni.

Nakkum April leh May thla khian France President thlanna hi neih a ni dawn a, Socialist Party chuan candidate atan Marine Le Pen an thehchhuak dawn. Ram mipui≠te ngaihdan lakah Fillon hian Le Pen lakah hma a hruai a ni.

Party candidate tling zo ta lo, Juppe chuan a chak lo mah se Fillon chu lawmpuina a hlan a, President chuh tuma beihnaah a thlawp tur thu a sawi. Juppe chuan Fillon chu rilru zalen tak, a nihna ang loa lan tum lo leh, a ṭha nia a hriatte phatsan loa kaltlangpui mi a ni, a ti.

Francois Fillon chuan an ram mipuiten amahah rinna nghat a, President atana an thlang tling a nih chuan an ram thlak danglam turin theihtawp a chhuah tur thu a sawi. Fillon chuan an ramin sum lama harsatna a tawh mek siamṭha turin sorkar hna 500,00-a tihtlem a tum a, hnathawh hunbi pawh tihpun a tum thu a sawi.

Kum 62 mi, Fillon hi Catholic ruh tak niin nau tihtlak leh anpui inneih phalna dodaltu a ni.