Pakistan sipai hotu atan Lt Gen Qamar Javed Bajwa ruat

Pakistan sorkar chuan an ram sipai hotu, Chief of Army Staff (COAS) atan Lieutenant General Qamar Javed Bajwa a ruat thar.

COAS nilai, General Raheel Sharif chu vawiin hian a term a tawp dawn a, amah thlaktu tur hi hun eng emaw chen sorkarin a ngaihtuah hnuah kar kalta Inrinni zan khan Prime Minister Nawaz Sharif-aín a puang ta a ni. Chairman Joint Chiefs of Staff Committee (CJSC) atan Lieutenant General Zubair Mahmood Hayat pawh ruat a ni bawk.

Pakistan sipai hotu thar tur, Lt Gen Qamar Javed Bajwal hi Army headquarters-a Inspector General of Training and Development ni lai a ni. COAS kalchhuak tur Gen Sharif pawh hi kum thum kalta khan sipai hotu atana dah a nih hmain he hna hi a lo chelh tawh a ni.

Islamabad-a US embassy chuan sipai hotu thar atan Bajwa ruat a ni chu a lawmpui thu sawiin, US chuan inlakhran duhtu leh firfiakte beihletna kawngah Pakistan thawhpui chu a inhuam reng a ni, a ti. Pakistan thuneituten, firfiakten ram ṭhenawmte laka pawikhawihna thlenna tura an ram leilung hman an remti lo tih an sawi pawh a hlawhltlin theihna atana puih an duh thu a sawi.