Khawvel Lawrkhawm

Nepal-ah lir a nghing

Nepal ramah nimin zing khan magnitude 5.5-a nain lirn a nghing.

Nepal National Seismological Cen≠ter chuan lir nghin ṭanna hi Everest bial, Salukhumbu district a ni tih a sawi a, hei hi an ram khawipui Kathmandu aṭanga khawchhak lam km 150 vela hla a ni. Nimina lirnghing hian thil tihchhiat lian tham a neih hriat a la ni lo a, mahse police-te chuan lir nghinna bial chhunga thingtlang khaw ṭhenkhat chu biakpawh theih an la ni lo a, report kimchang an la dawng thei lo tih an sawi.

Kum 2015 April 25 khan Nepal ramah hian magnitude 7.8-a nain lir a nghing a, chhiatna rapthlak tak a thlen a ni. He lirnghingin chhiatna a thlen vanga thi hi mi 9,000 vel an tling a, mi 22,000 in hliam an tuar. May 12, 2015 khan magnitude 7.3-a nain a nghing leh bawk.

In chim vangin mi pakua man

China khawchhak lam, Jiangxi Province-a power plant tur sak lai chu November 24 khan a chim a, in chim vanga thi hi mi 74 an tling tawh. Nimin khan in chim kaihhnawihah hian mi pakua man an ni.

Power station-a 1,000-megawatt coal-fired power unit tur sak hna hi kum 2015, July thla aṭang khan ṭan a ni a, kum 2018 kumtir lamah zawh hman beisei a ni. Police-te chuan nimina an man zingah hian engineering firm Hebei Yineng board chairman leh construction project-a chief engineer pawh an tel niin an sawi. Hemi hma hian mi 17 te chu thu zawhfiah turin hren an lo ni tawh bawk.

Philippines-a US embassy bulah bomb chhar

Philippines khawpui, Manila-a US embassy bulah nimin khan police-teín bomb an chhar a, hmun him lamah laksawn nghal a ni.

Police-te chuan bomb an chhar hi tualchhung siam niin an sawi. Senior Superintendent Joel Coronel chuan zing dar 7 velah khawlai tifaitu hnen aṭangin phone call an dawng a, bawlhlawh bawm pakhatah mobile phone-a electric wire inthlunzawm a hmuh thu a hrilh niin a sawi. Police-te kalin an endik nghal a, mobile phone chu 81mm mortar shell nen a lo inthlunzawm tih an sawi a ni.