Thailand Parliament-in lal atan Prince sawm

Thailand Parliament chuan Crown Prince MahaVajiralongkorn chu an ram lal ni turin a sawm.

Thailand lal, King Bhumibol Adulyadej chu kum 88 mi niin October 13 khan a thi a, a aiawhtu tur Crown Prince hian lal dinhmun luah tur hian a la inpeih loh thu leh, a pa sunna hun pe rih tura a ngen avangin tun thlengin lal nei loin an awm a, lal aiawh lailawk tur ruat a ni.

Kum 64 mi Crown Prince Vajiralongkorn-a hi an ram dan anga lal atana lakluh a nih theih nan hma lak chhoh mek a nih thu deputy prime minister Prawit Wongsuwan chuan a sawi. Cabinet chuan nimin khan Parliament-ah lal atana pawmpui turin Crown Prince hming hi a thehlut a, hemi hnu hian National Legislative Assembly speaker chuan an ram lal turin Crown Prince hi a sawm a ni.

Crown Prince hian a pa dam laiin a hun tam zawk chu ram pawn lam, a bikin ram a neihna Germany chhim lamah hun a hmang a ni. Vajiralongkorn hi a khawsak phung ṭha lo thin mah se Thailand ram hian an lal chhungkaw sawisel khapna dan khauh tak an neih avangin, a sawiselna lam thu hi puanzar a ni ngai lo. Nupui pathum a ṭhen tawh a ni. A pa thih hnuah lalchhungkaw telna tur thil pawimawhahte inlan mah se, thuchhuah erawh engmah a la siam lo. A pa ruang halral tur buaipuina pawh a farnu, Princess Sirindhorn kutah a dah. King Adulyadej hi kum khat sun a nih hnuin, a ruang hi hal a ni ang. Thailand ram dan hman ṭhinah chuan an lal ruang hi halral a nih hnuah chauh lal thar tur hi lakluh a ni ṭhin.