Protest camp-a awmte chhuak turin hriattir

US-a North Dakota governor chuan oil pipeline project duh lohna lantir a sorkar ramah inkulh, Native American leh activist-te chu an camp chhuahsan nghal turin a hriattir.

Governor Jack Dalrymple-aín hriattirna a tihchhuah hma hian, nawrh huaihawtna hmun enkawltu US Army Corps of Engineers chuan camp-a awm te chu an awmna hmun chhuahsan turin December 5 thleng hun a lo pe tawh a ni.

Standing Rock reservation bula Dakota Access Pipeline hi Standing Rock Sioux Tribe ram aṭanga mel chanve vela hlaa kaltlang tur a ni a, hei hi an hnam hian duh loin nawrh hi an huaihawt a ni. Standing Rock Sioux Tribe-te bakah activist-te pawhin project siam tum hian Native American hmun pawimawh leh tui an laknate a tichhe thei nia sawiin an dodal bawk.

Oil pipeline project duh lohna lantir hian state khawpui, Bismarck chhim lam km 72 vela hlaah an inkulh a, mahse Governor chuan an inkulhna hmun hi chhuahsan nghal turin a ti a, state leh local agency-te pawh camp chhuahsan duh loa awm luite tan
ṭanpui hna thawk lo turin a hriattir.

Governor Dalrymple chuan camp-a awmte chhuah tura thupek siam chu hman ṭan nghal a ni dawn a, a ṭul a nih chuan tihluihna hmanga hruai chhuah an ni ang, a ti. ìThlasik a thlen tawh avangin camp-a awm zui zel chu mihring hriselna atan a him tawk lo a niî a ti. Mahse nawrh huaihawt zinga hruaitute chuan thupek chu zawm an tum loh thu an sawi a, tihluihna hmanga nawr chhuah an tum a nih chuan buaina nasa zawk a chhuah mai an hlauhthawn thu an sawi. Thuneitute chuan khaw vawt hnuaia awmna turin a him tawk lo nia an sawi chu an chhuanlam mai a ni tiin, an inenkawl thei tih an sawi.

Dollar tluklehdingawn 3.9 senna tur 1,885-km pipeline project hi hna tam zawk thawh zawh a ni tawh a, Lake Oahe hnuai a kaltlangna chu thawh a la ni lo. He pipeline hmang hian Bakken shale oil chu tlawm zawk leh him zawkin North Dakota aṭang≠in Illinois kaltlangin US Gulf Coast refinery-ah pek a ni thei dawn a ni.