Khawvel

Ohio Univeristy beitu firfiak kap hlum

US-a Ohio State Univeristy, Columbus ami chu firfiak pakhatin chem nen a bei a, mi 11 a hliam. Pawikhawihtu hi police officer-in a kap hlum nghal a ni.

University beitu firfiak hi Abdul Razak Ali Artan a ni a, Somalia aṭangin Pakistan-ah a lut a, Pakistan-ah kum sarih a chen hnuah kum hnih kalta khan US-ah refugee angin a lut a ni.

Official-te chuan Thawhṭanni zing khan univeristy-ah gas leak report a awm avangin building aṭangin an chhuahtir a, pawn lama an dinkhawm laiin Artan hian a car khalhin, a chem nen mi awmkhawm chu a pawng beih ta niin an sawi. Pawikhawihna thlenna bula police officer awm chuan Artan hi a kaphlum tih an sawi. Hliam tuarte hming hi puanzar an ni lo a, an ngaihtuahawm lo nia sawi a ni. An zinga pakhat chu zirtirtu a ni a, midang chu zirlai vek an ni.

Khawvela upa berin kum 117 a tling

Khawvela mihring damlai zinga upa ber, Italy mi Emma Morano chuan nimin khan kum 117a tling.

Morano hi kum zabi 19 chhunga piang zinga dam hriat awmchhun a ni tawh. Kum 1899, November 29 khan a piang, Italy hmarlama Verbani khuaah a cheng. Unau pariat zinga a upa ber niin an unaua a dam awmchhun a ni. Mipuite chuan a chanchin an ngaihven hle tih sawiin, ram hrang hrang aṭangin amah hmu tura kal an awm reng thu a sawi. A rilru a la fim ṭha a, mahse a beng a ngawng tawh a, ṭawng a harsak bakah a mit pawhin khua hmu fiah tawh vak lo. A hun tam zawk chu mut nan a hmang tawh a ni.

SKorea President-in parliament thutlukna pawm dawn

South Korea President Park Geun-hye-i chuan a chungthua parliament thutlukna siam ang chu a pawm dawn tih a sawi.

President hi sorkar inrelbawlna kawnga a ṭhianṭha, nihna pawimawh chelh lo a inrawlh tir avangin bang tura nawr mek a ni a, he thil hriat chhuah a nih hnuah a ṭum thumna atan nimin khan an ram mipuite tan TV-ah thu a sawi a ni. Park-i chuan rorellai leh eptu party-ten an buaina tawh mek tinep theihna tura an inrem dan ang a nih chuan, parliament duhdan chu a zawm dawn a, a term tihtawi a ngai a nih pawhin a pawm tur thu a sawi. Mahse eptu lamin an phut anga president a nihna aṭanga a ban tum thu erawh a sawilang lo.