Covid-19 : Singapore-ah online-in inkhawm dawn

Coronavirus (Covid-19) leng vangin Singapore-a City Harvest Church-a inkhawm ṭhin mi 16,000-te tan online-a inkhawm an huaihawt zawk dawn thu kohhran hotute chuan an sawi.

Tunkar inkhawm lo awm turah hian ramchhunga Covid-19 darh zel tur laka mipuite him zawk nan leh he natna hri leng mek hi an rama kai an punchhoh avangin, online-a inkhawm hi buatsaih tum anih phah ta a ni. Online kaltlang hian Pathian thuchah pawh sawi a nih dawn thu City Harvest Church chuan a tarlang bawk.

Ministry of Health chuan Singapore-ah hian Covid-19 natna kai mi 58-a an pun chhoh thu a tarlang a, mahse heng zinga mi 15-te chu enkawl zui an nih hnuah damdawi-in aṭanga chhuah tir an ni. Singapore-ah hian mihring cheng hi mi maktaduai 5.7 vel an awm a, coronavirus rawn chhuahna hmun China dawta he natna hri kai hnem ber ram a ni.

Nimin khan China-ah chuan Covid-19 vang hian mi 121 an thih belh leh a, an zinga 116 chu hri hmuhchhuah ṭanna, Hubei province-a mi an ni. China ram pumah nimin khan hri kai thar hi mi 5,090 an awm a, hri kai chhinchhiah tawh chu 65,000 dawn an tling tawh. China health official-te chuan Covid-19 vangin health worker paruk an thi tawh a, 1,716 in an kai tih an sawi.