Khawvel

Turkey-a in kangah mi 12 thi

Turkey chhim lam, Adana province-a zirlai hmeichhe awmna dorm chu a kang a, mi 12 an kanghlum. Thi te hi zirlai 11 leh an zirtirtu pakhat an ni a, zirlai thite hi kum 14 hnuai lam vek an ni.

Kangmei chhuahna hi Aladag khuaa in chhawng thuma sang a ni a, electric kalsual vanga chhuak nia hriat a ni. Official-te chuan kangmei a chhuah hnuah a chhawng chung lama awmte chu tlanchhuah tum mah se, fire escape door chu a inkalh avangin an chhuak thei lo niin an sawi. Adana City Mayor Huseyin Sozlu chuan kawngkhar hi inkalh lo se chuan naupangte hi him taka an tlanchhuah hman tur thu a sawi a, he thil thleng hi governor office chuan a chhui chiang dawn tih a sawi bawk.

Uganda-a Rwenzururu lal tualthah thubuai siamsak

Uganda-a Rwenzururu bial-a an lal, King Charles Mumbere chu tualthah thubuai siamsak a ni.

Kar kalta khan Rwenzururu bialah hian inlakhran duhtute leh sorkar sipaite inkarah buaina nasa tak a chhuak a, mi 87 an thi. King Charles Mumbere hi sorkar laka inlakhran duhtute thlawp leh fuihah puh a ni a, kar kalta Inrinni khan a chenna in chu sipaiten dapin an man zui a ni. Mahse King Charles chuan inbeihna thlengah hian inhnamhnawiha a nieh loh thu a sawi. Rwenzururu lalram hi Uganda khawpui, Kampala aṭanga khawhtlang lam km 340 vela hla, Rwenzori tlangdunga awm a ni.

China-in Myanmar puih a inhuam

China chuan helhoin sipaite an beihna avanga Myanmar ramri-a buaina thlengte chingfel tura puih a inhuam thu a sawi. Helho leh sipaite inbeihna vang hian Myanmar mi eng emaw zat chu China ramah an tlanchhia a ni.

China Foreign Minister Wang Yi chuan an ram tlawhtu, Peace Commission chairman Tin Myo Win kaihhruai team hnenah, ramria inbeihna thleng ṭhin chu ṭha a ti lo hle tih sawiin, sipaite chu hel laka beihpui thlak titawp a, inbiakna hmanga an buaina chinfel dan zawng tura a duh thu a sawi.