Mosul khuaa cheng zahvein tui supply nei lo

Iraq sipaite chuan Islamic State (IS) firfiak kut aṭanga Mosul khua lak let tumin beihpui an thlak mek a, an inbeihnaah pipeline an kahchhiat avangin khawpuia cheng zinga a zahve zetin tui supply an nei lo.

Mosul-a Nineveh provincial council member, Hussam Al-Abar chuan khawpui chhungah hian mi maktaduai 1.5 vel an la khawsa mek niin a sawi a, inbeihna thleng vang hian mipuite dinhmun chu a chhe hle tih a sawi. Tui pipe kahchhiat a nih vang hian mi 650,000 velin tui supply an hmu thei tawh lo tih a sawi bawk. Tui bakah electricity, health leh ei tur lam thlengin harsatna an tawk tih a sawi.

Tui pekna kahchhiat a nih vangin mipuite hian tuichhunchhuah amite an sawi a, heng tuite hi a thianghlim tawk lo avang≠in an hriselna lam thleng≠a an nghawng theih an hlauhthawn thu an sawi.

Mosul khua-ah hian sipai leh firfiakte hi kar ruk chhung an inkap tawh a, Iraq commander-te chuan Mosul khawchhak lam bial 40% chu IS firfiakte kut
aṭang hian a la let tawh tih an tarlang. Sipaite chuan beihpui an thlak chhung hian civil mite chu pawn chhuak lo turin an ngen.

Iraq sipaiten beihpui an thlak hnu hian khawpui chhung aṭangin mi eng emaw zat an tlanchhuak a, mahse UN leh sipaiten an lo beisei lawk ang erawh an pha lo hle thung. Civil mi an tam avangin sipaite pawhin an duh angin beihpui an thlak chak thei lo a ni.

UN Humanitarian Coordinator, Lise Grande chuan inbeihna thleng mekah hian mi retheite chu a tuar nasa ber niin a sawi a, ei tur lakkhawm thlengin an buai tawh a ni, a ti. Sipai leh firfiakte hi an inbeih chhunzawm reng a nih chuan civil mite tawrhna chu a nasa dawn hle niin a sawi.

UN right office chuan Iraq sipaiten Mosul khua lak let tuma beihpui an thlak hnu hian, IS firfiakte hian khawpui chhunga cheng civil mi tam tak chu security force-te thlawpah puhin an tihlum tawh niin a sawi. November 22 pawh khan naupang kum sarih mi, Iraq security force-te awmna lam pana tlan chu firfiakten hian an kaphlum a ni. November 25 khan Iraq security force-te hnenah thuruk hrilha puhin civil mi 27 kahhlum an ni bawk.