Vietnam-ah tuilian vanga thi mi 16 tling tawh

Vietnam ram lailiah ruahsur nasa avangin kar liam ta kartawp aṭangin tulian leh leimin a thleng a, chhiatna thlenga thi hi nimin thleng khan mi 16 an tling tawh tih sorkar thuchhuah chuan a tarlang. Tuilian hian ziaawm lam a la pan thei lo a, khaw eng emaw zat chu tuiin a chim a ni.

Central Vietnam-a hmun eng emaw zatah chuan ni thum liam ta chhunga ruahtui tla chu mm 1,500 an tling a ni. Tuilian hian in 43,000 chuang leh, thlai chinna ram hectare 10,000 chuanga zau a chim tawh. Coffee chinna hmun tam tak a chim tel a, coffee thar hun lai a ni a,mahse, tuilian hian a tibuai hle.

Chhiatna thleng vang hian in leh sumdawnna hmun 553,000 chuangin nimin thlengin power supply an la nei lo bawk. Chhungkaw tam tak chu hmun him lama sawn chhuah a ni a, Gia lai province-ah chuan school-te khar a ni bawk. Khawchin zirtute chuan ruah nasa tak a la sur chhunzawm dawn nia sawiin, fimkhur turin mipui an chah.